पर्सा, ब्रहमचोक — पर्सा जिल्लाको ब्रहमचोक क्षेत्रको पूरब दिशातर्फ पर्ने टोलमा दिनदहाडै मोटरसाइकल चोरी भएको छ। स्थानीय निवासीको प्रदेश २–०३–०२२प २७४१ नम्बरको मोटरसाइकल अज्ञात व्यक्तिले चोरी गरेको पुष्टि प्रहरीले गरेको छ।
पीडितका अनुसार, मोटरसाइकल घर अगाडि पार्क गरिएको अवस्थामा चोरी भएको हो। उनी केही समयका लागि घर बाहिर गएका थिए, फर्किंदा मोटरसाइकल हराएको देखेका थिए।
चोरी भएको स्थान नजिकैको सीसीटीभी फुटेजमा चोरको गतिविधि स्पष्ट रूपमा कैद भएको प्रहरीले जनाएको छ। भिडियोमा चोरले सामान्य व्यक्तिजस्तै देखिएर गेट नजिक आएर मोटरसाइकलको लक फोडी, सिधै मोटरसाइकल लिएर गएको देखिन्छ।
स्थानीयवासीहरूका अनुसार यस क्षेत्रमा पहिले पनि यदाकदा चोरीका घटना हुँदै आएका थिए। तर पछिल्ला दिनमा यस्ता घटनाहरू दोहोरिन थालेपछि सर्वसाधारणमा त्रास र असुरक्षा बढेको छ।
पीडितले घटनापछि तुरुन्तै स्थानीय प्रहरी कार्यालयमा उजुरी दिएका छन्। प्रहरीले सीसीटीभी फुटेजको आधारमा चोरको पहिचान तथा खोजी कार्य तीव्र बनाएको जानकारी दिएको छ।
साथै, प्रहरी प्रशासनले सर्वसाधारणलाई सतर्क रहन र उक्त नम्बरको मोटरसाइकल (प्रदेश २–०३–०२२प २७४१) कतै देखेमा नजिकको प्रहरी कार्यालय वा पीडितसँग सम्पर्क गर्न अनुरोध गरेको छ।
