चाडपर्वमा शान्ति, सुरक्षा र सरसफाइमा विशेष ध्यान दिन पर्साका प्रमुख जिल्ला अधिकारी सुवेदीको आग्रह

वीरगञ्ज । आउँदै गरेका नेपालीहरूको महान् पर्व विजयादशमी, शुभ दीपावली र छठ पर्वलाई शान्तिपूर्ण, सभ्य र व्यवस्थित ढंगले मनाउन पर्साका प्रमुख जिल्ला अधिकारी तोयनारायण सुवेदीले  जिल्लावासीलाई विशेष सतर्कता अपनाउन आग्रह गरेका छन्।

पर्वहरूको अवसरमा सम्पूर्ण जिल्लावासीलाई सुस्वास्थ्य, दीर्घायु र प्रगतिका शुभकामना व्यक्त गर्दै प्रमुख जिल्ला अधिकारीले जिल्लाको शान्ति, सुरक्षा र सुव्यवस्था कायम राख्न सबैलाई सहयोग गर्न आह्वान गरेका छन्।

उनले जारी गरेको सूचनामा पर्व मनाउँदा परम्परादेखि चलिआएको मठ–मन्दिर तथा धार्मिक स्थलहरूमा अत्यधिक भीडभाड नगरी व्यवस्थित रूपमा पूजा–आराधना गर्न आग्रह गरिएको छ। त्यस्तै, भीडभाड हुने स्थानमा गरगहना नगर्न, व्यक्तिगत सम्पत्तिको सुरक्षा गर्न र कसैको मान–इज्जतमा आघात पुग्ने काम नगर्न सचेत गराइएको छ।

सूचनामा भनिएको छ, “मठ–मन्दिर तथा मेलामा जाँदा मादक पदार्थ सेवन नगर्नुहोस्। ध्वनि प्रदूषण हुने गरी उच्च आवाजमा डि.जे. वा अन्य साउण्ड सिस्टम प्रयोग नगर्नुहोस् र कसैप्रति दुर्व्यवहार वा अमर्यादित आचरण नगर्नुहोस्।”

जिल्लाको सदरमुकाम वीरगञ्जमा अझै पनि झाडापखाला तथा हैजा महामारीको जोखिम रहेकाले सरसफाइमा विशेष ध्यान दिन आग्रह गरिएको छ। फोहोर पदार्थ छोएपछि वा खाना खानुअघि साबुनपानीले राम्ररी हात धुने, उमालेको वा क्लोरिनयुक्त पानी मात्र पिउने र स्वास्थ्यवर्द्धक खाद्यपदार्थ सेवन गर्न आग्रह गरिएको छ।