पर्सा, १० कात्तिक। बाराको सुवर्ण गाउँपालिका–१ चरमोहना गाउँमा फेरि चोरीको घटना सार्वजनिक भएको छ। स्थानीय रामनरेश सिंहको घरबाट करिब २० तोला सुनका गरगहना चोरी भएको घटना बाहिरिएपछि गाउँमा सुरक्षा चिन्ता बढेको स्थानीय युवा ईन्जिनियर सुनील कुमार यादवले बताएका छन्।
चरमोहना गाउँमा यसअघि पनि चोरीका घटना भएका थिए। केही समयअघि चरमोहना लगायतका गाउँमा एकै दिन चारवटा घरमा चोरी भएको घटना सार्वजनिक भएको थियो। लगातार चोरीका घटना दोहोरिन थालेपछि स्थानीयवासी त्रसित बनेका छन्।
यसअघि इन्जिनियर यादवले गाउँमा चोरीका घटना नियन्त्रण गर्न सीसीटीभी क्यामेरा जडान, सडक बत्तीको व्यवस्था तथा प्रहरी गस्ती बढाउन माग गरेका थिए। उनले गाउँको सुरक्षा व्यवस्था प्रभावकारी बनाउन सम्बन्धित निकायको ध्यानाकर्षण गराएका थिए।
फेरि ठूलो परिमाणमा सुनका गरगहना चोरी भएको घटना सार्वजनिक भएपछि स्थानीयस्तरमा सुरक्षा व्यवस्थाबारे प्रश्न उठेको छ। चोरीका घटना दोहोरिँदा स्थानीयवासीको घर तथा सम्पत्तिको सुरक्षाप्रति चिन्ता बढ्दै गएको छ।
घटनाबारे प्रहरीले अनुसन्धान गरिरहेको छ। चोरीमा संलग्न व्यक्तिको पहिचान तथा चोरी भएका गरगहना बरामद गर्न प्रहरी टोलीले अनुसन्धान अघि बढाएको छ। पछिल्ला घटनाले गाउँमा सुरक्षा निगरानी थप प्रभावकारी बनाउनुपर्ने आवश्यकता देखिएको छ।
यद्यपि जिल्ला प्रहरी कार्यालय बाराका प्रवक्ता एवम् प्रहरी नायव उपरीक्षक मीन बहादुर घले संग जानकारी लिदा अहिले अनुसन्धान भैरहेको जानकारी दिएका छन् ।
