रक्सौल
भारत–नेपाल सिमाना अन्तर्गत रक्सौलस्थित मैत्री पुल नजिकै भारतीय सुरक्षा बल (SSB) द्वारा नयाँ पोस्ट निर्माणको प्रयाससँगै तनाव उत्पन्न भएको छ।
भारततर्फको सिमानाक्षेत्रमा रहेको पुल नजिकै SSB ले आफ्नो चौकी निर्माण गर्न खोजेपछि नेपाली स्थानीयवासी र सुरक्षाकर्मीबीच असमझदारी पैदा भएको हो। नेपाली पक्षले सिमाना क्षेत्र नजिकै भइरहेको संरचना निर्माण नेपाल–भारत सन्धिको भावना विपरीत रहेको भन्दै विरोध जनाएको छ।
विवादका क्रममा दुबै पक्षका सुरक्षाकर्मीहरू सतर्क अवस्थामा रहेका छन् भने सिमानामा सुरक्षाको चहलपहल तीव्र बनेको छ। स्थानीय नेपाली नागरिकहरूले SSB द्वारा गरिँदै आएको गतिविधि सिमानाको यथास्थितिमा परिवर्तन ल्याउने प्रयास भएको भन्दै आपत्ति जनाएका छन्।
नेपाल प्रहरी र सशस्त्र प्रहरी बल (APF) ले स्थिति नियन्त्रणमा राख्न सिमा क्षेत्रमा निगरानी बढाएका छन्। घटनास्थलमा दुई देशका स्थानीय प्रशासनबीच संवादको प्रयास भइरहेको जानकारी प्राप्त भएको छ।
नेपाल–भारतबीच खुला सिमाना भए पनि यस्ता संरचना निर्माणले दुई देशबीचको विश्वासमा असर पुग्न सक्ने विज्ञहरूको टिप्पणी छ। दुबै देशका सम्बन्धित निकायहरूले संयमता अपनाई वार्तामार्फत समाधान खोज्नुपर्ने आवाज उठिरहेको छ।
