लस एन्जलस, अमेरिका – अमेरिकाको लस एन्जलस शहरमा आप्रवासन तथा भन्सार प्रवर्तन विभाग (ICE) ले छापा मारेर ११८ जना अवैध आप्रवासीलाई पक्राउ गरेपछि स्थिति तनावपूर्ण बनेको छ। उक्त घटनापछि प्रदर्शनकारीहरूले संघीय सरकारी भवन घेराबन्दी गर्दै ICE अधिकारीहरूमाथि आक्रोश व्यक्त गरेका छन्।
प्रदर्शनका क्रममा केहि प्रदर्शनकारीहरूले आक्रामक व्यवहार देखाएको र केही ICE अधिकारी तथा उनीहरूका परिवार सदस्यहरूलाई समेत लक्षित गरिएको अमेरिकी सञ्चार संस्था फक्स न्यूजले जनाएको छ।
त्यहाँको गृह सुरक्षा विभाग (DHS) ले डेमोक्र्याट नेताहरू—हकीम जेफ्रीज, करेन बास, टिम वाल्ज र मिशेल वू—माथि आप्रवासन निकायविरुद्ध उत्तेजक बयान दिएको आरोप लगाएको छ। DHS अनुसार, नेताहरूका ती अभिव्यक्तिका कारण परिस्थिति झनै उग्र बनेको हो।
ICE ले पक्राउ परेका मध्ये पाँच जना व्यक्तिहरू ग्याङ्ग सदस्य रहेको र उनीहरू लागूपदार्थ तस्करी, घरेलु हिंसा तथा मानव तस्करीजस्ता गम्भीर अपराधमा संलग्न रहेको आरोप लगाएको छ। बाँकी पक्राउ परेका व्यक्तिहरू विभिन्न आप्रवासन कानुन उल्लंघनमा दोषी ठहरिएका हुन्।
विवाद चर्किंदै गएपछि DHS ले सबै राजनीतिक दल र नेताहरूलाई संयमित र जिम्मेवार अभिव्यक्ति दिन आग्रह गरेको छ। विभागले सार्वजनिक शान्ति र सुरक्षाको सुनिश्चितताका लागि नेताहरूको भूमिकालाई महत्त्वपूर्ण भन्दै, हिंसा र द्वेषयुक्त व्यवहार नगर्न सबैलाई चेतावनीसमेत दिएको छ।
अमेरिकामा आप्रवासन नीतिको विषय फेरि चर्चामा आएको छ। आगामी निर्वाचन नजिकिँदै गर्दा यो मुद्दाले राजनीतिक तातो लिएको छ। एकातर्फ प्रशासन कडाइ गर्नुपर्ने पक्षमा देखिँदा, अर्कातर्फ मानवीय पक्ष र आप्रवासी अधिकारको वकालत गर्नेहरूबीच तीव्र ध्रुवीकरण देखिएको छ।
लस एन्जलसमा भएको पछिल्लो घटनाले अमेरिकी समाजमा आप्रवासनसम्बन्धी बहसलाई थप चर्काएको छ।
