देशका विभिन्न जिल्लामा पछिल्लो पाँच महिनामा १ हजार ११६ आगलागीका घटना भएका छन् ।
यी घटनामा १६ जनाको ज्यान गएको छ ।
नेपाल प्रहरीका प्रवक्ता प्रहरी वरिष्ठ उपरीक्षक (एसएसपी) विश्वराज अधिकारीले विपद्मा १४५ जना घाइते भएको जानकारी दिए ।
उनका अनुसार घटनामा १९० घर, १३० गाई गोठ र एउटा सरकारी कार्यालय ध्वस्त भएका छन् भने ४ सय ५५ गाईवस्तुको मृत्यु भएको छ ।
आगो नियन्त्रणका लागि आठ हजारभन्दा बढी प्रहरी परिचालन गरिएको थियो ।
आगलागीबाट करिब रु ५० करोडको धनमाल क्षति भएको प्रवक्ता अधिकारीले बताए ।
आगलागीका कारण २९ परिवार विस्थापित भएको प्रहरीले जनाएको छ । कोशी प्रदेशमा सबैभन्दा बढी १३१ स्थानमा आगलागी भएको छ ।
प्रहरीले मंगलबार सार्वजनिक गरेको तथ्यांकअनुसार मधेश प्रदेशमा २६९, वाग्मती प्रदेशमा ७०,
काठमाडौं उपत्यकामा १४०, गण्डकी प्रदेशमा ८१, लुम्बिनीमा ११४, कर्णाली प्रदेशमा ५१ र सुदूरपश्चिम प्रदेशमा ६० आगलागीका घटना भएका छन् ।
राष्ट्रिय विपद् जोखिम न्यूनीकरण तथा व्यवस्थापन प्राधिकरण (NDRRMA) ले हिजो मात्रै देशभर १९ स्थानमा आगलागी भएको जनाएको छ ।
आगलागीमा परी दुई जना घाइते भएको एनडीआरआरएमएका प्रवक्ता डा दिजन भट्टराईले बताए ।
दिनहुँ आगलागीका घटना भइरहेकाले आगलागी, बिजुली र ग्यास सम्बन्धी सामग्री प्रयोग गर्दा विशेष सावधानी
अपनाउन एनडीआरआरएमएले सबैलाई आग्रह गरेको छ ।पाँच महिनामा एक हजारभन्दा बढी आगलागीका घटना, १६ जनाको मृत्यु
- विज्ञापन -
