वीरगञ्ज, २९ वैशाख । मकवानपुरको इन्द्रसरोवर गाउँपालिकास्थित सिस्नेरी–दक्षिणकाली सडकखण्डमा गए राति एक सवारी दुर्घटना भएको छ ।
सोमबार राति करिब ११:१० बजे काठमाडौंबाट हेटौँडातर्फ जाँदै गरेको बा.प्र.०१–०३३ च ५२५८ नम्बरको माइक्रो बसको ब्रेक फेल भई सडकको भित्तामा ठोक्किँदा ९ जना भारतीय नागरिक घाइते भएका छन् ।
जिल्ला प्रहरी कार्यालय मकवानपुरका अनुसार घाइतेमध्ये तीनजनाको अवस्था गम्भीर रहेको छ । दुर्घटना लगत्तै प्रहरी चौकी खानिखेत र सिस्नेरीबाट खटिएको टोलीले घटनास्थल पुगेर घाइतेहरूको उद्धार गरेको थियो । चालकसहित ११ जना सवार उक्त गाडीमा नौजना भारतीय र दुईजना नेपाली नागरिक रहेका थिए ।
प्रहरी सहायक निरीक्षक मनोजकुमार यादव र रामवली साहको नेतृत्वमा खटिएको टोलीले सबै घाइतेहरूलाई उद्धार गरी थप उपचारका लागि काठमाडौं पठाएको जानकारी दिएको छ ।
