वीरगन्ज,१५पुसःबुद्ध एयरका सञ्चालक तथा संस्थापक वीरेन्द्रबहादुर बस्नेतसमेत जोडिएको नयाँ राजनीतिक दल गतिशील लोकतान्त्रिक पार्टी (गतिलो) ले आगामी प्रतिनिधिसभा निर्वाचनका लागि समानुपातिकतर्फ न्यूनतम ११ जनाको बन्द सूची निर्वाचन आयोगमा बुझाएको छ ।उक्त सूचीमा पर्सा जिल्लाको वीरगन्ज महानगरपालिका–१० की सामाजिक अभियन्ता शैली चौधरीको नाम पनि समावेश छ ।
पार्टीले आदिवासी जनजाति, अल्पसङ्ख्यक समुदाय, दलित तथा महिलालाई प्राथमिकता दिँदै यो न्यूनतम सूची तयार पारेको जनाएको छ । पार्टी अध्यक्ष दिनेश प्रसाईँका अनुसार, सूचीमा सेलेब्रिटीहरू नराखी केन्द्रीय कमिटीको सिफारिसमा आम नागरिकलाई प्रतिनिधित्व गराइएको हो।सूचीको पहिलो नम्बरमा चेपाङ समुदायको प्रतिनिधित्वका लागि विश्वास प्रजा राखिएको छ ।
त्यसपछि क्रमशः करुणा डुम्जन, रेजिना गुरुङ, नगमा खरेल, अल्का सापकोटा, दीर्घबहादुर खड्का, शैली चौधरी, अनामिका चौधरी, गीता केसी दर्नाल, रुबी खातुन र निशा राजवंशीको नाम समावेश छ ।
वीरगन्जकी शैली चौधरी मारवाडी समुदायबाट आउने एक चर्चित सामाजिक अभियन्ता हुन् । उनी यौनिक तथा लैङ्गिक अल्पसङ्ख्यक (एलजीबीटीआई) समुदाय र दलित समुदायको उत्थानका लागि लामो समयदेखि सक्रिय छन् । हाल अस्ट्रेलिया सरकारले प्रदान गर्दै आएको अस्ट्रेलियन अवार्ड प्राप्त गरी छात्रवृत्तिमा अस्ट्रेलियामै स्नातकोत्तर अध्ययनरत चौधरीले वीरगन्जको आदर्श स्कुलबाट एसएलसी र हरिखेतान बहुमुखी क्याम्पसबाट स्नातक तहको अध्ययन पूरा गरेकी छन् । उनी वीरगन्जको प्रतिष्ठित संस्था संस्कृतिको पूर्व अध्यक्षसमेत रहेकी छन् ।
पछिल्लो समय उनले समता फाउन्डेसन र दलित लाइभ्स म्याटर जस्ता संस्थामा काम गर्दै दलित, महिला, अल्पसङ्ख्यक तथा एलजीबीटीआई समुदायको अधिकारका लागि आवाज उठाउँदै आएकी छन् ।
