वीरगञ्ज । नेपाल प्रिमियर लिग (एनपीएल)का उपाधि दाबेदार जनकपुर बोल्ट्सले टोलीका कप्तान अनिलकुमार साहलाई चोटका कारण गुमाउनुपरेको छ । चितवन राइनोजविरुद्धको पछिल्लो खेलमा चोट बोकेपछि साहले प्रतियोगिताका बाँकी खेल खेल्न नसक्ने भएका छन् । क्लबका अनुसार उनको हातमा शल्यक्रिया गर्नुपर्ने भएको छ ।
चितवनविरुद्धको खेलमा साह केवल आठ रनमै आउट भएका थिए । ब्याटबाट बलले ठोक्किँदा उनको हातमा चोट लागेको थियो । चोट सुरुमा सामान्य देखिए पनि गम्भीरता बढ्दै जाँदा उनी मैदानबाट बाहिरिएका थिए । हाल शल्यक्रियाको तयारीमा रहेका साहको अनुपस्थितिले जनकपुरको रणनीतिमा ठूलो प्रभाव पार्ने देखिएको छ । टोलीले अब कप्तानीको जिम्मेवारी मार्की खेलाडी आशिफ शेखलाई सुम्पिएको छ ।
अनिल साह जनकपुरका लागि यस प्रतियोगितामा महत्त्वपूर्ण खेलाडी हुन् । समूह चरणका खेलहरूमा उनले १३२ रन बनाएर टोलीलाई क्वालिफायरसम्म पुर्याउन महत्त्वपूर्ण योगदान दिएका छन् । कप्तानका रूपमा उनले टिमलाई उत्कृष्ट नेतृत्व प्रदान गर्दै सुरुवाती खेलहरूमा बलियो प्रदर्शन सुनिश्चित गरेका थिए ।
यद्यपि, साहको अनुपस्थितिमा जनकपुरको टप अर्डर ब्याटिङ र नेतृत्व क्षमतामा चुनौती थपिएको छ । समूह चरणमा जनकपुरले सुदूरपश्चिम रोयल्ससँग ७२ रनको लज्जास्पद पराजय भोगिसकेको छ । भोलि हुने पहिलो क्वालिफायरमा फेरि सुदूरसँग प्रतिस्पर्धा गर्नुपर्ने भएकाले साहको अनुपस्थिति टोलीका लागि थप दबाबपूर्ण परिस्थिति बन्नेछ ।
अनिलकुमार साहको अनुपस्थितिमा कप्तानीको जिम्मेवारी सम्हाल्न आशिफ शेखलाई तयार गरिएको छ । अनुभवी खेलाडीका रूपमा शेखको जिम्मेवारी अब केवल नेतृत्वमा सीमित छैन । उनी टोलीका शीर्ष ब्याट्सम्यान पनि भएकाले टप अर्डरलाई स्थिरता प्रदान गर्नुपर्नेछ ।
सुरुवाती चार खेलमा बलियो देखिएको जनकपुरको ब्याटिङ र बलिङ पछिल्ला खेलहरूमा अस्थिर देखिएको छ । विशेष गरी, टप अर्डरले अपेक्षाकृत प्रदर्शन गर्न नसक्दा टोलीले केही खेल गुमाएको थियो । कप्तानी परिवर्तनसँगै आशिफ शेखले टोलीलाई मनोबल पुनः उच्च बनाउने चुनौती सामना गर्नुपर्नेछ ।
सुदूरपश्चिमविरुद्धको खेल जनकपुरका लागि “गर या मर” जस्तो स्थितिमा छ । समूह चरणमा सुदूरसँगको हारको बदला लिन र फाइनलको यात्रा सुनिश्चित गर्न जनकपुरले सामूहिक प्रदर्शनमा ध्यान दिनुपर्नेछ । साहको अनुपस्थिति भए पनि अन्य खेलाडीहरूले जिम्मेवारी लिँदै प्रदर्शन सुधार्ने अपेक्षा गरिएको छ ।
जनकपुर बोल्ट्सका समर्थकहरू अब नयाँ कप्तान आशिफ शेख र टोलीका अन्य महत्त्वपूर्ण खेलाडीहरू बलिङ आक्रमणका नेतृत्वकर्ताहरूबाट उत्कृष्ट प्रदर्शनको प्रतीक्षा गरिरहेका छन् । साहको अनुपस्थितिलाई चुनौती नभई प्रेरणाको रूपमा लिँदै टोलीले बलियो खेल खेल्ने विश्वास समर्थकले गरेका छन् ।
जनकपुरको टोलीले आगामी खेलमा कस्तो प्रदर्शन गर्छ भन्ने कुराले उपाधि यात्रामा ठूलो प्रभाव पार्नेछ । तर, साहको योगदान र कप्तानीको अभावले टोलीमा पक्कै पनि चुनौती थपिएको छ ।
