काठमाडौँ । श्रीलङ्काको एक अदालतले बिहीबार अपदस्थ राष्ट्रपति गोटाबाया राजपाक्षेको सरकारका दुई पूर्वमन्त्रीलाई भ्रष्टाचारको एक ऐतिहासिक मुद्दामा दशकौँको जेल सजाय सुनाएको छ। यो फैसला देशको राजनीतिक वृत्तमा महत्त्वपूर्ण मानिएको छ।
कोलम्बो उच्च अदालतले पूर्व खेलकुदमन्त्री महिन्दानन्द अलुथगामगे र पूर्व व्यापारमन्त्री अनिल फर्नान्डो लाई राज्यको कोषको ५ करोड ३० लाख रुपैयाँ (१ लाख ७७ हजार डलर) दुरुपयोग गरेको अभियोगमा दोषी ठहर गरेको छ। उनीहरूले गोटाबायाका जेठा दाइ महिन्दा राजपाक्षेको सन् २०१५ को पुनःनिर्वाचनको असफल प्रयासलाई बढावा दिने क्रममा १४ हजार क्यारम बोर्ड र ११ हजार ड्राफ्ट सेटसहित बोर्ड गेम दान गर्न सरकारी पैसा प्रयोग गरेको पाइएको थियो। दोषी ठहर भएका दुवैलाई २ हजार डलर जरिवाना पनि तोकिएको छ।
फैसलाअनुसार, अलुथगामगेलाई २० वर्षको जेल सजाय सुनाइएको छ भने फर्नान्डोलाई २५ वर्षको सजाय सुनाइएको छ। अलुथगामगे अहिले भ्रष्टाचारको आरोपमा सफलतापूर्वक मुद्दा चलाइएको राजपाक्षे नेतृत्वको मन्त्रिमण्डलका सबैभन्दा वरिष्ठ सदस्य हुन्।
राजपाक्षे दाजुभाइहरू सत्ताबाट बाहिरिएपछि छ वर्षअघि दुवै जना विरुद्धको मुद्दा सुरु भएको थियो। तर, गत वर्ष नयाँ सरकार गठन नभएसम्म यो मुद्दा सुस्त गतिमा अघि बढिरहेको थियो।
अलुथगामगेले सन् २०२२ मा एक चिनियाँ आपूर्तिकर्तालाई ६० लाख ९ हजार डलरको भुक्तानी गर्न अनुमति दिएको आरोपको छुट्टै अनुसन्धानको पनि सामना गरिरहेका छन्।
स्मरण रहोस्, सन् २०१० देखि २०१५ सम्म खेलकुदमन्त्रीका रूपमा काम गरेका अलुथगामगेले सन् २०२० जुनमा श्रीलङ्काको राष्ट्रिय क्रिकेट टोलीलाई सन् २०११ को विश्वकप फाइनलमा भारतको पक्षमा धाँधली गरेको आरोप लगाएका थिए। यो दावी अन्ततः प्रमाणित हुन सकेन। उनले सन् २०२० मा आफूले त्यस समयमा कथित म्याच फिक्सिङको षड्यन्त्र ‘खुलासा गर्न नचाहेको’ बताएका थिए, “सन् २०११ मा हामीले जित्नुपर्ने थियो, तर हामीले खेल बेचेका थियौँ। मलाई लाग्छ म अहिले यसको बारेमा कुरा गर्न सक्छु। म खेलाडीहरूलाई समावेश गरिरहेको छैन, तर केही वर्गहरू संलग्न थिए।” मुम्बईको वानखेडे स्टेडियममा भएको फाइनलमा श्रीलङ्का ६ विकेटले पराजित भएको थियो। भारतीय र श्रीलङ्काका दुवै खेलाडीले कुनै पनि गलत काम गरेको कुरा अस्वीकार गरेका छन्।
