बिरगंज, पर्सा — ऐतिहासिक तथा धार्मिक दृष्टिले महत्वपूर्ण श्री गहवा माई मन्दिरमा आगामी असार १३ गते भव्य रथ यात्रा आयोजना हुने भएको छ। श्रद्धालुहरूको ठूलो सहभागिता रहने अपेक्षा गरिएको यस धार्मिक शोभायात्रालाई व्यवस्थित र सफल बनाउन श्री गहवा माई तीर्थ क्षेत्र विकास समितिले विभिन्न उपसमितिहरू गठन गरेको छ।
समितिको हालै सम्पन्न बैठकले सुरक्षा, स्वागत सत्कार, प्रचार–प्रसार, स्वच्छता, स्वास्थ्यजस्ता पक्षलाई मध्यनजर गर्दै तयारीहरू अगाडि बढाएको जानकारी दिएको छ। रथ यात्रामा धार्मिक झाँकी, बाजागाजा, सांस्कृतिक कार्यक्रम लगायतका विविध आकर्षण समावेश गरिने आयोजकले बताएका छन्।
श्री गहवा माई मन्दिर बिरगंज नगरको एक प्रमुख धार्मिक स्थल हो, जहाँ हरेक वर्ष ठूलो संख्यामा भक्तजनहरूको आगमन हुने गर्दछ। यस वर्षको रथ यात्रा अझ भव्य बनाउने लक्ष्यसहित तयारी तीव्र पारिएको विकास समितिका पदाधिकारीहरूले जनाएका छन्।
